這篇我係幫 BEAR 寫的, 佢話要呻吓! 
BEAR 每日返工放工都係搭的士, 久不久就聽到佢講遇到啲瘋狂司機, 有幾瘋狂?
1. 啱啱嚟咗冇耐, BEAR 放工嚟我地宜家住緊呢度睇樓. 個司機唔識路, 亂咁兜, 又唔打上台問路. 因為啱啱嚟, BEAR 都唔識路, 所以好驚個司機唔知車佢去邊. 原本 Dhs 17 的路程, 最後埋單 Dhs 50 PLUS, 可想而知個司機兜咗幾多路.
終於到咗目的地, 個司機竟然要求 BEAR 俾多啲錢, 因為佢揸咗好遠路喎. BEAR 唔肯, 個司機就落車同 BEAR "理論" ......
2. 之後有一次, 的士到屋企, Dhs 17, BEAR 俾 20 蚊諗住等找錢啦. 點知個司機唔肯找, 仲話 " Sir, I expect Dhs 30." 你 expect 還你 expect, 有咩理由要 BEAR 俾多 10 蚊.
3. 呢單我親眼目睹: BEAR 落車個司機又落, 仲喺後面講一大堆我地唔識聽嘅話, 當然屋企樓下啲保安有做嘢啦. 我問咩事. BEAR 話個司機要收多佢 Dhs 10. BEAR 梗係唔制啦, 做咩冇啦啦要俾多 10 蚊你!
以上幾單碎料. 下面呢幾單先係堅嘢:
BEAR 上咗的士, 司機遲遲唔肯開車. 態度又差. 終於開車喇, 佢一邊用阿拉伯話定唔知咩話係咁 "咦咦哦哦." BEAR 話聽唔明佢講乜, 但都知唔係好嘢.
最離譜係個司機用時速 150 km/hr 送 BEAR 返屋企. BEAR 返屋企條路唔使上 highway 架, local street 你都行 150 km/hr, 你係咪想攞人命??? 仲要有 speed bump 都唔減速, 照飛車可也. 轉彎時又急轉彎.
更瘋狂的是司機突然將車內所有窗開晒, 吹到頭都甩. BEAR 話成程車好似坐緊亡命的士, 仲勁過香港的亡命 VAN 仔.
你話個司機係咪癲咗?! BEAR 叫停咗幾次個司機都唔聽.
落車時個司機仲落車跟住 BEAR, 好似想打佢咁. 好彩屋企樓下有幾個彪形大漢保安攔住.
睇到呢到, 大家估唔估到咩事令啲司機咁瘋狂? 其實第 2 點已經有晒提示....
之唔係車程太近, 又唔可以拒載, 司機咪唔好老脾, 搵 BEAR 嚟發洩囉.
真係好瘋狂, 我知路程係短咗啲, 但嚴重超速咁危險, 我真係接受唔到囉. 我地屋企喺咁近, 都冇辦法架! 唔通要 BEAR 放工行返屋企咩?!
至於嗰單堅嘢, BEAR 已經打咗去投訴. 態度差都算啦, 嚴重超速, 魯莽駕駛呢樣真係好離譜. 
BEAR 話差不多每次放工搭的士, 司機知道去咁近時都會 "咦咦哦哦." 
註: 1 Dhs = HKD 2.11
BEAR 放假的日子, 通常我都放吓自己假, 即是拒絕煮飯, 拒絕做家務! 是日懶人餐 中提到的是其中一日.
之前在家樓下見過 Pizza Hut 的速遞電單車, 問過速遞員, 我們住的地區是在外送範圍之內. 今日不煮飯, 想吃 pizza, 打電話去 order 的時候, 店員卻說不送, 請店員再請示經理, 並說明上次見到速遞員的情況, 得到的答案都是一樣, 唔送. 
我問 BEAR 為甚麼不理論一下, 若有最低消費, 我們今次的 order 應該也夠. BEAR 講笑說: 唔理論喇, 一陣嘈完理論完, 佢送嚟啲 pizza 你都唔知食唔食好. 哈哈哈哈.... 
(純粹講笑.)
最後我們的第二選擇是從另一間餐廳 order 燒雞. 一人半隻. YUMMY YUMMY...
這間餐廳的薯條非常好吃的. 雞用了 Peri Peri Sauce 來烤, 好味. 
昨日出了整整一日街, 去買手信返香港.
全部都不是甚麼名貴貨品, 不過有些特色, 希望收到的人鍾意啦! (題外話: 雖說是阿聯酋手信, 但產品大部份都是 Made in China 的. 哈哈哈!)
右邊相架裡面有 7 層沙, 採自阿聯酋 7 個 Emirates. 個杯之前見到有女子樣的, 不過今次去睇冇晒貨喇!
我都很喜歡這些圍巾, 我會收埋一條. 
食品系列: 印度咖哩, 以及 Dates. Dates 算是 UAE 特產.
送給爸爸媽咪的情侶裝 T-shirt, 希望佢地齊齊著住去街! 
吖, 好唔好全家一人一件, 家庭裝咁出街呢? 嘩哈哈!
估估這是甚麼? 答案在最底. (提示: 廚房用品) 
還有之前買的鹽樽:
答案: 都是鹽樽, 不過沒有駱駝.
本來夜晚去小尾羊打邊爐的, 不過諗住慳 Dhs 100 的士錢, 哈哈! 都係明天先去, 因為橫豎明天都要出去.
於是決定煲花旗蔘雞湯! 立即打俾媽媽越洋請教.
資源有限, 用了花旗蔘, 乾瑤柱, 杞子, 薑. (如有蜜棗和米酒更好.)
家中只剩下幾粒乾瑤柱, 我很喜歡吃杞子, 所以加了大量.
雞先要出水, 去污物同肥油.
最複雜的過程是搣皮, 經過 失敗的泰式辣雞 一役之後, 今次我戴手套, 用剪刀, 過程非常順利. 同埋, 嚴禁 BEAR 在旁觀看過程!
這隻雞買回來時已去了內臟, 太好!
將所有材料滾呀滾, 滾一會放入真空煲, 慳煤氣又不用睇火. 
煲了 3 小時左右, 完成!
後記: 味道不錯, 很香花旗蔘味! 不過略嫌不夠雞味, 可能我把雞出了 4 次水太多.
今朝我暈低咗.
事源昨晚太夜訓, 今早醒來頭痛, 於是諗住出廳食粒藥. 一起床行兩步, 右腳抽筋抽得好厲害, 抽抽吓就暈低咗. 醒來的時候訓在梳化. ( BEAR 當時在我身邊, 他抱我去梳化.)
我好容易暈, 真正醫學原因不明. 睇過醫生, 心電圖, 血壓, 血液一切正常. 所以我暈已經不是甚麼大事, 甚至變成趣事, 從前返工成日俾人笑, "你唔好嚇佢呀, 一陣佢又暈呀....", "你又暈喇?", "嘩! 你仲暈得多過我喎!"
最攪笑一次暈:
中五當年, 會考之前一次在學校教員室問緊老師嘢, 講講吓 "噼啪" 暈低咗. 老師大驚, 抬了我入教員室休息. 攪笑的是, 所有教我的老師大為緊張, 個個都以為我讀書太勤力, 太緊張會考所以暈倒. 其實呢次, 同媽媽講返, 應該係我之前一日食了幾碗綠豆沙, "涼" 得滯所以暈低, 同會考無關!
最嚴重 + 辛苦一次暈: 
一次同婆婆去街, 準備一起參與表弟學校的同樂日. 行去操場期間, 我覺得好暈, 連忙捉住婆婆的手, 之後暈低咗. 其他家長抱我在操場旁的長凳訓低. 由於是公眾地方, 所以有途人報了警, 救護車很快來到. 救護員來到時我已經慢慢醒返, 但他們說為安全計, 要到醫院檢查一下. 結果去了荃灣仁濟醫院, 做了一系列檢查.
這次暈的原因我真的不知道, 不過呢次真係好辛苦好唔舒服. 是暈得最厲害的一次.
今次嚇親婆婆, 印象中婆婆一直攬住我. 
同埋我真正感受到救護員這份工作真的很專業, 深深敬重! 
最尷尬一次暈: 
多年前同一班朋友去大尾篤踩單車! 不是中暑, 有食早餐! 一到目的地, 我去完廁所出來眼前一片漆黑, 暈咗. 朋友抱我到路邊訓低. 後來聽朋友說, 我暈低之後, 咀唇和臉發白. 由於朋友都是基督徒, 他們圍在我身邊祈禱. 其後我醒來, 有好心途人車我到救護站.
最瘀的一次暈: 
中學時代, 參加運動會的 800 米賽跑, 能夠完成賽事. 不過過了十多分鐘暈低了.
最 "不好意思" 一次暈: 
剝完大牙, 暈了在診所. 事前有食飽, 不過唔知係咪太驚, 所以暈低. 我是當日最後一個病人, 阻了醫生護士收工.
最無聊的一次暈: 
去年 12 月去澳洲旅行, 去看企鵝回巢, 一不小心腳踏空, 在看台梯級拗柴. 之後爸爸幫我按下隻腳. 係非常之痛, 不過唔明白呢次暈咩. 不過我好犀利, 在暈緊的同時我不斷同自己講 "唔好暈呀, 呢度好多人呀, 暈咗冇得睇企鵝喇...." 結果今次冇暈低, 純粹覺得好天旋地轉, 挨在媽媽膊頭訓一陣就冇事.
哈哈! 分享完畢!
大家不用擔心我的身體, 當笑話一則啦!
在 無厘頭生活趣事 裡說過, 在阿聯酋打長途電話返香港比較貴.
有很多有心的 BLOG 友介紹一些上網打電話的方法給我, 很可惜, 大部份的網頁都被 BLOCK 了.
SKYPE 固然是被 BLOCK 的. 詳細原因我不太知道. 大概是因為國營的 Etisalat 是這裡唯一間電話公司. 此外, 有一些色情網頁都是被 BLOCK 的. 哈哈! 幸好上 Facebook, Youtube 和 Yahoo BLOG 就完全沒有問題!
要用 SKYPE, computer to computer 那種. 其實不是沒有辦法的. 這裡雖然上不到 SKYPE 的網頁, 但若電腦有這個 APPS, 就可以避過 filter, 你明白我的意思吧! 所以今次回香港, 我都要帶我的 notebook.
***
BEAR 放假, 我們原先的計劃是去海邊散步, 及去海邊的博物館行.
但一出門口, 我們就知道今日的計劃要改變.
首先是非常熱, 相信阿聯酋的夏天已來臨. 而且風非常大, 還夾雜著沙塵.
阿聯酋處於沙漠地帶, 所以間中會有沙塵滾滾的情況出現.
行不成海邊, 所以去了行 Mall.
最近愛上這首歌, 有看江蘇衛視的 <非誠勿擾>, 一定聽過這首歌!
之前叫 BEAR 返香港一定要彈呢首歌俾我聽. 誰知行過家樂福玩具部見到個玩具琴 BEAR 就即興彈了.
片長 44 秒, 有興趣就聽下 BEAR 先生用玩具琴演奏一曲啦!
不知不覺, 原來我仲有 17 日就返香港喇! 真興奮! 
今次都係搭 Emirates. 因為有 Chauffeur-drive service, 所以叫爸爸媽咪不用來機場接機. 媽咪話煮好餸等我返屋企.
看其他 BLOG 友 POST 的香港美食相, 睇到我流晒口水, 今次終於到我有得食.
對上一次返香港係 12 月, 係好近期的事. 不過我對香港嘅美食, 真係一日不食, 如隔三秋呀! (仲有最緊要去剪頭髮! )
BEAR 因為要返工, 所以會 5 月頭先返香港.
返香港, 最緊要係食, SHOPPING 一定唔少得. 寫個 LIST 先:
食: (排名不分先後)
1. 媽媽婆婆煮的住家菜
2. 元氣 & 板長壽司, 禾田日式放題
3. 麥當當之脆香雞翼及脆辣雞腿包
4. 越色的 PHO 及牛油雞翼
5. 街邊魚旦鱿魚燒賣牛雜雞蛋仔
6. 車仔麵之家
7. Mr. Steak Buffet
8. 西貢 OR 屯門海鮮
9. 稻香及德興打邊爐 (仲有屋企邊爐. )
10. 豬潤粥 + 鮮魚皮
11. Lawry's Prime Rib
12. 八月芳, 小南國 & 鴻星飲茶
13. 泉章居霸王雞及牛骨髓
14. 白珍珠奶茶
15. 茶餐廳下午茶, 奶茶 + 鴛鴦
16. 自家製 BBQ
暫時諗到咁多. 大家仲有冇咩好介紹?
之後是一連幾日的公眾假期, 不知家裡有甚麼計劃呢?
昨晚臨訓之前和 BEAR 說起一個我們以前玩的遊戲, 就是每天教對方一個新的英文字.
說著說著, BEAR 突然說出一個英文字: SQUAT
BINGO!!! 當時在我心中的也就是這個英文字: SQUAT!
這個 SQUAT 字對我們沒有特別意義, 但同一時間在我們的腦海閃過, 哈哈! 真奇妙!
心有靈犀, 簡單一點說, 其實就是巧合. 不過我們卻經歷了一次令我們到現在都很驚訝的 "巧合".
那時我們還在讀大學, 身份只是同學, 其實不太熟悉. 我們共同 TAKE 的一班, 一星期上課一次, 而每堂的功課就是在 COURSE 的 WEBSITE 上留一些回應. 那個 WEBSITE 24/7 開放, 而大家都有一星期的時間做這樣功課.
我們拍拖後 BEAR 告訴我一件事:
有一次他交完功課, 看看其他同學的 POST, 給他發現, 我 POST 回應的時間竟然和他 POST 的時間是完全一樣. 準確度是同時, 同分, 同秒! 你說神奇麼?!
一個住在 Alhambra, 一個住在 Westwood, 相隔廿幾 miles, 事前沒有溝通過, 卻有著同樣的心神.
大家有試過在討論區或留言板留言嗎?
若試過的話, 你大概可以想像到, 兩篇留言在同一時間 (記著是同一秒!) 發表, 發生的機會是多麼的渺茫.
即使是約定, 也很難在同一秒發出留言吧!
這是我和 BEAR 之間的一個小故事.
趁在愚人節, 分享一下我在阿聯酋遇到的一些生活趣事:
1. 前幾日和 BEAR 到屋企對面一間叫 Lavander 的餐廳吃晚飯. 看看 Menu, 有一項是 Daily Special, 卻沒有註明是甚麼. 問一問侍應, 他竟然說, " Lunch time 呢度有 BUFFET, Daily Special 就是將 BUFFET 的剩餘物資炒成一碟." (OH. 你都好誠實! 聽你講完更加唔會 order Daily Special!)
2. 由阿聯酋阿布扎比打長途電話返香港大概是 Dhs 2.69/MIN. 其實有些貴. 我們在電話公司 JOIN 了一個 PLAN, 打電話到香港有優惠, 大概是 Dhs 1.91/MIN. 不過 JOIN 了這項長途電話優惠, 之後打去 local landline 及手提, 以及香港以外的長途電話都會比原價貴 10%. (這是甚麼優惠?! 一邊有折頭, 另一邊又加了價!)
3. 阿聯酋的物品價錢大部份都有仙位, 如一個牛角包 Dhs 2.75. 不過 1 毫子及 5 仙的硬幣的流通量極少, 所以每次去買嘢 (特別係超市), 都不會得到 exact change.
如果買嘢總數是 Dhs 49.95, 你可以付 Dhs 49.75; 或者你付 Dhs 50, 收銀員就不會找錢. 又例如買本書 Dhs 50.85, 你付 Dhs 100, 收銀員通常問你有沒有一蚊, 沒有的話, 就找你 Dhs 50 算數. (如是者, 有時會有賺, 有時會蝕, 但最後都應該 average out. 不過真係唔明白超市盤數點計?! 收銀機的 CASH 同系統條數應該唔會 match! )
備註: 阿聯酋的流通硬幣為 Dhs 1, Dhs 0.50, Dhs 0.25. 順帶一提, 硬幣沒有英文註釋, 只有阿拉伯文, 我也花了一些時間辨認. )
最頂是 Dhs 1, 左下角是 Dhs 0.50, 右下角是 Dhs 0.25.
Photo copied from magicinrhapsody.blogspot.com.
4. 這裡的的士司機, 大多數 assume 乘客不用找錢. 這與上面的例子無關. 因為的士收費的尾數一定是 Dhs 0, 0.25, 0.50 或 0.75. 不過很多司機都將條數自動 round-up 幾蚊, 例如車資是 Dhs 27.25, 你付 Dhs 30, 若你不說, 司機多數不會找錢. 我們不介意付 TIPS, 但請不要每次都自己 assume 不用找錢. (我們基本上日日都搭的士, 每次多俾幾蚊, 不得了.)
5. 這是 BEAR 的經歷. 阿聯酋人口八成是 EXPAT. 離鄉別井工作, 自然辛苦, 也不時想回鄉探望家人. BEAR 說一臨近聖誕節, 年尾等節日, 他的下屬特別容易病, 一告就是幾星期病假.
更奇怪的是, 在那些時候, 也特別多下屬的家人離世. 有家人離世, 下屬自然要回鄉幾個星期. 這情況下, 不用扣 A/L, 因為這算是 Emergency Leave. ( Emergency Leave 當然要有證明, 但通常追問多幾次, 下屬們又說不用回鄉, 你說奇怪不奇怪?!)
