2011年8月28日 星期日

我們的一週年

去年的今日, 我正式做了 Mrs. BEAR... 

BEAR 說咁快就一年; 我話咁先一年, 激死佢...哈哈哈... 

首先講單驚險事: 頭先食完晚飯搭的士返屋企, 上到 freeway, 個的士司機 miss 咗個出口, 佢夠膽死喺 freeway 倒車!!! 嗰條 freeway 係 Dubai Road, 係一條好繁忙的公路, 啲車係開緊 150 km/hr. 仲有, 佢唔係喺 pull over lane 倒車, 係一條有車行緊嘅線! 倒咗 10 幾米左右啦, 啲車喺隔離飛過, 真係嚇鬼死!  

算啦. 據我的經驗, 下一個出口係冇路調頭的, 起碼要行多 Dhs 20 先有位返轉頭. 以前試過一次喇. 

言歸正傳...

結婚一週年, BEAR 要返工, 還要開會, 所以也只能一起食餐晚飯當慶祝. 我們去了 Yas Hotel 食 Iftar Buffet. 食物大部份是阿拉伯食物, 不難吃, 只能說不合我們的口味.

我和 BEAR 是大學同學, BEAR 到現在都常說很難想像一個 133A 的同學會做了他的老婆...

當時大家 take 同一班, 有一次上堂之前, BEAR 一句 "你係咪 XXX 個 friend?" 就讓我們成為朋友. (真係好老土!)

之後有半年時間我和 BEAR 沒有聯絡, 一段電話留言又把我們連繫上了... 

哈哈!

明天開始一連 3 日 Eid 假期, 我們的活動是執屋! YEAH! 因為後日有朋友到訪! 

返咗嚟 10 日都未執好間屋, 等 BEAR 放假一齊執嘛!

2011年8月27日 星期六

Upgrade or downgrade?!

今日我地認真冇食神...

明明上網見到 Yas Hotel 話今日有 brunch, 諗住打去訂位啦, 點知話今日仲係 Ramadan, lunch time 唔開, 要食 buffet 就只得晚上的 Iftar buffet. Iftar buffet 大部份都係阿拉伯嘢食, 不太合我地口味, 所以算吧.

退而求其次, 諗住叫外賣食烤雞啦, 點知間餐廳架外賣電單車壞咗, 冇得送外賣. (Ramadan 期間餐廳不設堂食.)

諗住食 KFC 啦, 打去落晒 order, 過咗一陣之後個接線生打返嚟, 話 Ramadan 期間呢間 KFC 5 PM 先開門, 即係又冇得食.

最後打去叫壽司外賣, 結果足足等咗兩個鐘先送到嚟. 唔怪得佢嘅, Ramadan 應該好多人 order 壽司, 不過真係餓暈我地喇. 
OK! 講返個新 BLOG, 我尋晚 upgrade 咗喇, 原先我諗住留守到最後一刻俾人逼遷先算, 不過聽幾位 BLOG 友講, 到 9 月 1 日一次過一大班人 upgrade, Yahoo 個 server 有可能應付唔到, 到時唔見 POST 唔見相就無謂啦. 所以趁尋晚得閒, back up 完就 upgrade.

過程都算順利, 冇唔見嘢, 不過我就不太喜歡個新 BLOG...

1. 字體唔大唔細, 一係太大, 一係太細.

2. 太長嘅留言 SHOW 唔晒, 回覆嘅留言一樣唔可以太長.

3. 去唔到未 upgrade 新 BLOG 的 BLOG 友度, 有啲甚至顯示為 "沒有此用戶"!

4. 啲 spacing 好麻煩, publish 之後有啲字自己變大咗, 有時又無啦啦隔咗行.

5. "最近訪客" 同 "誰連繫著我" 係咪冇咗?!

6. 每個 POST 的 "累積瀏覽" 有啲問題, 尋日明明係 "2", 今日變咗 "0".

7. 最新的留言放在最後一頁, 要查看好麻煩.

8. 新 BLOG 係咪唔俾加自己嘢?! 我以前有個溫度表同 flag counter, 係咪冇得用?

9. 已 upgrade 超過 24 小時, 何解仲有 "資料搬移中請稍後" 個柜柜?

10. 所有 POST publish 的時間被改動過! 有啲日期變埋!!!

希望會有改進啦.  

2011年8月25日 星期四

Ramadan 之初體驗

之前成日聽在 UAE 的朋友說 Ramadan 有幾冇啖好食, 今年我終於有機會體驗下喇!

Ramadan 通常在回教日曆的第 9 個月, 為期 29 或 30 日, 日子都是靠睇月光的位置來決定 (政府有個部門專門負責呢樣事).

Ramadan 期間回教徒每日由日出到日落都不可進食, 飲水都唔得. 目的係要回教徒杜絕一切慾望, 潔淨心靈, 好好自我反省, 練習自我控制, 忍耐, 自律等美好品德, 不必要的娛樂都要禁止, 而祈禱次數亦會增加.

因為要節食, 所以所有回教徒每日只需工作六小時, 中間還有祈禱和休息時間. 唔食嘢唔飲水, 真係好難有氣力做嘢.

由於回教徒要節食的關係, 所有食肆, 包括商場裡的 food court 規定日出至日落都不可以開門做生意, 所有食物都不可以露眼. 

加上大部份商店都要到日落先開門, 想去行 mall? NO WAY!
冇錯! 啲舖頭成個月都做唔到咩生意, 成個國家生產力下降

商場裡的 food court 都關門大吉:



商場裡的 food court 都關門大吉


回教徒要節食, 咁非回教徒呢? 一樣有規矩要遵守!

唔可以在公眾地方飲食, 飲啖水都唔得! 有朋友的朋友在法庭工作, 他說在 Ramadan 期間當街飲食會被監禁一日.

飲水要靜雞雞, 唔可以俾人發現, 因為回教徒都好認真對待 Ramadan 呢個日子. BEAR 的公司更誇張到要將飲水機收埋.

早幾日 BEAR 放假, 我地諗住 lunch 去食羊架 + 行 mall, 臨出門口才醒起是 Ramadan! 行程被迫取消!

上次落機時影的, 機場的煙酒免稅店要繼續營業, 就要封上木板, 被免飲品露眼:



日落之後, 大家就可以進食, 這一餐叫做 Iftar. 早幾日我就同 BEAR 以及他的同事一齊去 One to One Hotel 食 Iftar Buffet. 每位 Dhs145.


特別的帳篷設計, 配合 Ramadan 這個日子.


食物以阿拉伯菜為主:





當然少不了甜品啦:


Ramadan 冇啖好食, 加上在極炎熱的夏天, 好多外國人都選擇離開 UAE 避一避. 我住緊個屋苑好明顯喺夜晚少咗好多燈, 周圍 "靜英英". 

Ramadan 之後就係假期, 叫 Eid, 今年有 5 日咁多, 我係時候諗下同 BEAR 去邊度玩.

2011年8月18日 星期四

開心的時間過得特別快...

又係時候講拜拜喇.

兩個月就咁過咗喇, 時間真係過得好快, 仲有幾個鐘我就要出機埸, 回阿布扎比喇.

未玩夠! 未食夠呀!!!

在香港時成日以為大把時間, 有好多日都因為太熱而冇出街, 結果又錯失了周圍去的好機會.

之前我同 BEAR 講好, 橫掂在阿布扎比日日都見, 返到香港我地就玩 "自顧自", 結果都係成日一齊出街. 哈哈哈...

唔捨得家人, 希望一陣出機場唔好又喊啦. 希望你地真係 12 月可以一齊嚟 UAE 玩啦. 我個腦已經有晒 PLAN 帶你地去邊度玩架喇. 等你地嚟先一齊去帆船酒店擦餐勁!

睇下天氣報告, 嚟緊一星期阿布扎比係會非常非常熱同曬! 加上正值 Ramadan 冇啖好食, 唔知呢個月點過. 哈哈! 又係一個新的體驗!

仲有我家的露台, 冇見兩個月唔知變成點, 會唔會變咗個沙灘?! (詳見: 風沙過後...) 今次專登在香港帶條夠晒長的水喉返去, 第時洗露台就可以輕鬆啲.

我都有新的計劃, 希望可以落實 9 月開始學阿拉伯文. 學樣新知識同識多啲朋友啦.

返到去阿布扎比係星期四, BEAR 話星期五去食 Friday Brunch 喎!

等冇咁熱時去 plant souq 買啲植物種下, 我好想種蓄茄, 蔥, 同士多啤梨呀!

祝大家身體健康, 生活愉快! 5 個月後香港見! (exactly 5 個月!)