兩個月就咁過咗喇, 時間真係過得好快, 仲有幾個鐘我就要出機埸, 回阿布扎比喇.
未玩夠! 未食夠呀!!!
在香港時成日以為大把時間, 有好多日都因為太熱而冇出街, 結果又錯失了周圍去的好機會.
之前我同 BEAR 講好, 橫掂在阿布扎比日日都見, 返到香港我地就玩 "自顧自", 結果都係成日一齊出街. 哈哈哈...
唔捨得家人, 希望一陣出機場唔好又喊啦. 希望你地真係 12 月可以一齊嚟 UAE 玩啦. 我個腦已經有晒 PLAN 帶你地去邊度玩架喇. 等你地嚟先一齊去帆船酒店擦餐勁!
睇下天氣報告, 嚟緊一星期阿布扎比係會非常非常熱同曬! 加上正值 Ramadan 冇啖好食, 唔知呢個月點過. 哈哈! 又係一個新的體驗!
仲有我家的露台, 冇見兩個月唔知變成點, 會唔會變咗個沙灘?! (詳見: 風沙過後...) 今次專登在香港帶條夠晒長的水喉返去, 第時洗露台就可以輕鬆啲.
我都有新的計劃, 希望可以落實 9 月開始學阿拉伯文. 學樣新知識同識多啲朋友啦.
返到去阿布扎比係星期四, BEAR 話星期五去食 Friday Brunch 喎!
等冇咁熱時去 plant souq 買啲植物種下, 我好想種蓄茄, 蔥, 同士多啤梨呀!
祝大家身體健康, 生活愉快! 5 個月後香港見! (exactly 5 個月!)
橙BB
回覆刪除2011年9月18日下午12:36
我好耐無寫blog同睇blog喇...都唔知你原來返過嚟香港...我响機場返工架...早知約妳tea一tea啦...!
見妳仲好勤力咁寫blog...等我一陣放工返去慢慢追番妳每編blog先^__^
回覆
嘉芙蓮
嘉芙蓮
2011年9月18日下午4:57
Yahoo 升級之後啲 BLOG 友仔啲名唔同晒, 好多我都唔認得呀, 成日都要好尷尬咁問人地係邊個! 你係邊個呀?
我好快又會返香港, 睇下到時約唔約到見面啦!
Amy Wong
Amy Wong
2011年8月19日下午9:59
唔緊要啦,轉個頭又返嚟香港啦.
回覆
嘉芙蓮
嘉芙蓮
2011年8月24日下午10:56
YEAH! 你講得啱呀!
非典型港女
非典型港女
2011年8月19日下午3:07
等你學阿拉伯文教下我地啦！
回覆
嘉芙蓮
嘉芙蓮
2011年8月24日下午10:56
一定! 不過聽聞好難學的! 我有個朋友同我一齊學, 又有講阿拉伯文的朋友, 希望可以學得好啲啦.
EE
EE
2011年8月19日上午12:24
兩個月唔算短啦!幾個月之後又返來!唔使喊啦
回覆
嘉芙蓮
嘉芙蓮
2011年8月24日下午10:55
哈哈! 你講得啱呀! 時間過得好快! 好快又可以返香港.
冬日 Winter
冬日 Winter
2011年8月18日下午11:57
嘩....妳返來有兩個月...? 有冇咁耐呀...!!
回覆
嘉芙蓮
嘉芙蓮
2011年8月19日上午12:06
我都唔覺原來返咗香港咁耐! 好似返咗先一陣又要走人喇!
xxl
xxl
2011年8月18日下午8:33
人未走已經安排5個月後又番嚟.太幸福啦!
回覆
嘉芙蓮
嘉芙蓮
2011年8月19日上午12:07
我好想宜家即刻就返香港呀! hate transition!
嘉芙蓮
嘉芙蓮
2011年8月18日下午3:04
嘉芙蓮~~我剛剛send左sms俾你啊! 可能我遲了, 可能你已經上機了 anyway, 一路順風! 同埋, 好開心認識你!
回覆
嘉芙蓮
嘉芙蓮
2011年8月19日上午12:04
下午 3 點幾, 我上咗機喇! 不過好多謝你!
我都好開心可以識到你呀! 我下次返香港一定會再搵你去食嘢!
Keep in touch!!! 祝你考試成功! 工作順利!
Rosemary Garden
Rosemary Garden 2011年8月18日下午12:13
帶條水喉返去? 過關會吾會比人問架
回覆
嘉芙蓮
嘉芙蓮
2011年8月22日下午12:49
哈哈! 順利過關! 冇人問! 我有個細細地嘅鐘同條水喉一齊放, 我媽媽講笑話過機時啲人以為係電線同計時炸彈.
Viv W
Viv W
2011年8月18日上午11:27
真係好快wor... 不過你5個月後又返,有期待,時間過得更快
回覆
嘉芙蓮
嘉芙蓮
2011年8月22日下午12:50
係啦, 宜家期待再返香港, 到時係冬天, 應該可以去多啲街!
ringo 穎翱
ringo 穎翱
2011年8月18日上午9:18
唔係啩?水喉都要帶返去!妳真節儉。 學咗阿拉伯文後記得教吓大家喎!
回覆
嘉芙蓮
嘉芙蓮
2011年8月22日下午12:47
因為喺呢度搵唔到一條啱心水嘅水喉, 所以山長水遠喺香港帶條過嚟! YEAH!
島耕作
島耕作
2011年8月18日上午8:50
生活要有對比先感受到開心 . 成日都開心就會習慣成自然 , 變得平淡架喇 .
回覆
嘉芙蓮
嘉芙蓮
2011年8月22日下午12:46
你又講得幾有道理! 不過我好怕啲過渡期, 心裡上好難過.
毛豆
毛豆
2011年8月18日上午8:46
噢 ,真係好快過左2個月啦 ...好似你返左黎冇幾耐咋...次次都係要臨走時先覺呢度未去,果度未到架 ...不過都唔緊要啦,咁先有藉口快D又返過黎嘛 ...你買左水喉啦,有冇買埋個勁射咀呀 , 咁先沖沙易好多架...有冇買袋裝既鴛鴦 ,奶茶呢....我估你都會有好多野冇買啦 ...下次啦...哈哈... 祝你一路順風, 返到去學下新野, 時間都好充實啦...all the best
回覆
嘉芙蓮
嘉芙蓮
2011年8月22日下午12:46
YEAH! 我有買奶茶呀! 不過未開嚟飲住. 買嘢食返去就係有呢個唔好處, 要就住就住食, 因為食完就冇喇. 下次返香港, 要好好計劃下去邊, 唔係又嘥晒啲時間. 不過到時係冬天, 應該好啲.